கவிஞர்: திவ்யா ஸ்ரீதர்
கல்லிலும் மலரும் நம்பிக்கை!
மண்ணில் மட்டுமல்ல… செங்கற்களின் இடுக்கிலும் முளைத்திருக்கிறது இச்சிறு பூ!
வேரூன்ற மண் இல்லை, பற்றிக்கொள்ள பெரும் இடமில்லை, தலைசாய்க்க நிழலுமில்லை… ஆனாலும் அதன் மனதில் வாழ்வதற்கான நம்பிக்கை மட்டும் வேரூன்றிக் கிடக்கிறது!
தடைகள் நிறைந்த சுவரிலும் தனக்கான சிறு இடம் தேடி, தலைநிமிர்ந்து பூத்திருக்கிறது இந்தப் பூவின் வாழ்க்கை!
வாழ்க்கையும் அப்படித்தானே… வசதிகள் இருந்தால்தான் வாழ்வென்றில்லை, வாய்ப்புகள் கிடைத்தால்தான் வளர்வதுமில்லை!
வாழ்ந்து பார்க்க வேண்டுமென்ற வைராக்கியம் மட்டும் இருந்துவிட்டால், வழியற்ற இடத்திலும் வாழ்வதற்கான வழி பிறந்துவிடும்!
இடம் கிடைக்கவில்லை என்று இயற்கை தன் முயற்சியைக் கைவிடவில்லை… இடையே சுவர் வந்ததென்று இதன் பூக்கும் ஆசையும் நின்றுவிடவில்லை!
மனிதா… இந்தச் சிறு பூவிடம் கற்றுக்கொள்! வாழ்க்கை உனக்கான இடத்தைத் தரவில்லை என்றாலும், கிடைத்த சிறு இடத்திலாவது உன் இருப்பை அழகாக்கு!
ஏனெனில்… வாழ்வதற்குப் பெரிய இடம் தேவையில்லை, வாழ வேண்டும் என்ற நம்பிக்கை இருந்தால் போதும்!
உங்களுக்கும் கவிதைகள் எழுதி பதிவிட வேண்டுமா?! இந்த லிங்கை கிளிக் செய்யவும்.
