கவிஞர்: சினேகிதா ஜே ஜெயபிரபா
ஒளி வெள்ளம் இருளகற்ற
ஒளிர்ந்து ஒளிருதே நதியலையும்
அல்லும் பகலென மிளிர
அகலிலும் பகலவன் வெளிச்சமோ
விண்ணில் பூத்த பட்டாசுகளும் மண்ணில் ஒளிர்ந்ததோ வண்ணமலர்களாய்
நரகாசுர வதத்தின் முடிவோ
வனவாச முடிவின் மகிழ்வோ
மாவலி அரசர் வரவோ
அறுவடை அதனின் நிறைவோ
அலங்காரக் கோலங்கள் அழகென
ஆடம்பர வேடங்கள் பலப்பல
இன்னும் இருக்கத்தான் இருக்கிறது
இக்கால நரகனின் அரக்கத்தனம்
வேடம்தான் வேறு வேறாய்
ஆடம்பரம் அகங்காரம் அலங்காரமென
வேரறுக்க இயலா நிலையிலே
இயல்பு எல்லாம் வேரறுக்கப்பட்டு
வெல்லவே ஏற்றுவோம் தீபங்கள்
நல்லவை நலமென ஒளிரவே
அன்பின் திரி ஏற்றுவோம் அவனியில் மனிதம் மாண்புற
இயல்பாய் இருந்திட இயன்றிடில்
இறைமையின் நிறைமை ஒளிருமே
அவரவர் அரக்கத்தனம் அழித்திட்டு
அன்பின் அகலென மின்னுவோம்
உங்களுக்கும் கவிதைகள் எழுதி பதிவிட வேண்டுமா?! இந்த லிங்கை கிளிக் செய்யவும்.
